پیپلز پارٹی قبضہ مافیا، سندھ حکومت کرپشن، نا اہلی اور لوٹ مار کا بدترین شاہکار بن چکی ہے،حافظ نعیم الرحمن

پیپلز پارٹی قبضہ مافیا، سندھ حکومت کرپشن، نا اہلی اور لوٹ مار کا بدترین شاہکار بن چکی ہے،حافظ نعیم الرحمن
کراچی کے عوام کا کوئی پُر سان ِ حال نہیں، سندھ حکومت 15برس میں کراچی کے 3360ارب روپے کھا چکی ہے،پریس کانفرنس سے خطاب
ایم کیو ایم اور پیپلز پارٹی کی نورا کشتی جاری ہے ، مصطفیٰ کمال کے دور میں OZT کے ہسٹوریکل شیئر کی کلاز کو ختم کیا گیا
بلاول بتائیں اٹھارویں ترمیم کے ذریعے صوبوں کو اختیارات تو مل گئے ہیں لیکن پی ایف سی ایوارڈ کیوں جاری نہیں کیا جاتا؟
پنجاب کا بلدیاتی ایکٹ مسترد،7دسمبر کو پنجاب بھر کے ڈسٹرکٹ ہیڈ کوارٹرز میں بھر پور احتجاج اور آئندہ کا لائحہ عمل دیا جائے گا
نیپا چورنگی پر معصوم بچے کی المناک موت افسوسنا ک و قابل مذمت، ہمارے یوسی چیئر مین نے 29اکتوبر کو شکایت کی تھی،منعم ظفر خان

امیر جماعت اسلامی پاکستان حافظ نعیم الرحمن نے ادارہ نورِ حق میں امیر کراچی منعم ظفر خان و دیگر رہنماؤں کے ہمرا ہ پریس کانفرنس سے خطاب کرتے ہوئے کہا کہ پیپلز پارٹی ایک قبضہ مافیا، سندھ حکومت کرپشن، نا اہلی اور لوٹ مار کا بدترین شاہکار بن چکی ہے اور اس کے سرپرست وہ لوگ ہیں جن کو اپنی مرضی کی ترامیم اور قانون سازی کرنی اور استشنیٰ حاصل کرنے ہوتے ہیں، کراچی صوبے کے بجٹ کا 98فیصد حصہ فراہم کرتا ہے لیکن اس شہر اور عوام کا کوئی پُر سان حال نہیں، سندھ حکومت گزشتہ 15برس میں کراچی کے 3360ارب روپے کھا چکی ہے، صوبوں اور انتظامی یونٹس بنانے کی بحثیں چھیڑ کر عوام کو لڑوایا جاتا ہے، ایم کیو ایم اور پیپلز پارٹی کی نورا کشتی چل رہی ہے، ایم کیو ایم بتائے جب سندھ حکومت، کراچی کے اداروں، اختیارات و وسائل پر قبضہ کر رہی تھی تو وہ اس جرم میں شریک اور وڈیروں و جاگیرداروں کے ساتھ کیوں کھڑی تھی؟ مصطفیٰ کمال کے دور میں آکٹرائے ضلع ٹیکس کے ہسٹوریکل شیئر کی کلاز کو ہی ختم کر دیا گیا تھا، ہمارا مطالبہ ہے کہ بلدیاتی حکومتوں کو باقاعدہ شہری حکومتوں کا درجہ اور آئین میں تحفظ دیا جائے، آرٹیکل 140-Aمیں موجود ہے کہ تمام مالیاتی،سیاسی،انتظامی اختیارات مقامی حکومتوں کو منتقل کیے جائیں، بلاول بھٹو کو آئین کے ساتھ کھلواڑ کرنے میں تو کوئی مسئلہ نہیں ہوتا لیکن وہ 18ویں ترمیم کے ساتھ چھیڑ چھاڑ کو بہت بڑا مسئلہ سمجھتے ہیں وہ بتائیں اٹھارویں ترمیم کے ذریعے صوبوں کو اختیارات تو مل گئے ہیں لیکن پی ایف سی ایوارڈ کیوں جاری نہیں کیا جاتا؟ پنجاب کا بلدیاتی ایکٹ کالا قانون ہے جسے ہم مسترد کرتے ہیں،7دسمبر کو پنجاب بھر کے ڈسٹرکٹ ہیڈ کوارٹرز میں بھر پور احتجاج اور آئندہ کا لائحہ عمل دیا جائے گا۔ نواز لیگ بادشاہ سلامت کی طرح حکمرانی کررہی ہے، عوام سے براہ ِ راست یوسی چیئر مین منتخب کرنے تک کے اختیارات لے لینا عوای مینڈیٹ کی توہین ہے، جماعت اسلامی کا نعرہ”عوام کو اختیار دو“ ہے اور ”بدل دو نظام تحریک“ عوام کو اختیار دلانے کی تحریک ہے، مقامی حکومتوں کے قیام اور ان کو بااختیار بنانے کی تحریک کو تیز تر کریں گے،جماعت اسلامی منصورہ لاہور میں اسلامی تحریکوں کا انٹر نیشنل سیکریٹریٹ بنا رہی ہے، ٹرمپ کے کہنے پر غزہ میں اپنی فوج بھیجنے کی سخت مخالفت اور مزاحمت کریں گے، اسحاق ڈار اپنی فوج غزہ نہ بھیجنے کا واضح اور دو ٹوک اعلان کریں،پاکستان میں حماس کے دفاتر قائم کیے جائیں، قابض میئر مرتضیٰ وہاب واٹر اینڈ سیوریج کارپوریشن کے چیئر مین ہیں نیپا چورنگی کے قریب کھلے مین ہول میں گر کر جاں بحق ہونے والے معصوم بچے کے افسوسناک واقع کی ذمہ داری براہ راست ان پر ہی عائد ہوتی ہے۔ پریس کانفرنس سے خطاب کرتے ہوئے منعم ظفر خان نے نیپا چورنگی کے قریب معصوم بچے کی المناک موت پر گہرے دکھ اور افسوس کا اظہار کرتے ہوئے کے ایم سی اور واٹر کارپوریشن کی شدید مذمت کی اور کہا کہ افسوسناک بات یہ ہے کہ واقعے کے دس،بارہ گھنٹے بعد بھی کوئی حکومتی ذمہ دار وہاں نہیں آیا،حتی کہ جماعت اسلامی کے چیئرمین،وائس چیئرمین اور کونسلرز حکومت کے ذمہ داران کو فون کرتے رہے لیکن نہ اے سی نہ ڈی سی فون اٹھارہا تھا خود مرتضی وہاب کو میسج کیے گئے لیکن ان کی طرف سے بھی کوئی رسپانس نہیں آیا، کے ایم سی کہیں موجود نہیں تھی، بی آر ٹی ریڈلائن پر پچھلے پانچ سال سے کام جاری ہے، لیکن یہ بننے کا نام نہیں لے رہا،اگلے تین چار سال تک بھی یہ مکمل ہوتا نظر نہیں آتا، جماعت اسلامی کے چیئرمین ریاض اظہرنے اس گڑھے کے حوالے سے 29اکتوبر کو باقاعدہ کمپلین کی تھی، لیکن کوئی سنوائی نہیں ہوئی، شہر میں جگہ جگہ گڑھے ہیں،انفرااسٹرکچرتباہ حال ہے، سڑکیں ٹوٹی ہیں،مسلسل حادثات ہورہے ہیں،لیکن سندھ حکومت کے کانوں پر جوں تک نہیں رینگتی، حافظ نعیم الرحمن نے مزید کہا ہے کہ ریڈ لائن کے نام پر اہل کراچی کی صحت اور جانوں سے کھیلا جارہا ہے، اس پر ابھی تک 30فیصد بھی کام مکمل نہیں ہواہے، دھول مٹی اڑرہی ہے، کوئی متبادل راستے فراہم نہیں کیے گئے،اگر یہ بی آر ٹی بن بھی گئی تو بھی عوام کے لیے مشکلات کا باعث بنی رہے گی کیونکہ اس پروجیکٹ کے ڈیزائن میں خرابی ہے،ہمارا مطالبہ ہے کہ اس پراجیکٹ کوختم کیا جائے اور یونیورسٹی روڈ کو ازسر نو بحال کیاجائے، تاکہ لوگ سکون کا سانس لے سکیں، انہوں نے کہا کہ سندھ حکومت اختیارات نچلی سطح پر منتقل کرنے کے لیے تیار نہیں،ٹاؤنز کو فنڈز فراہم نہیں کیے جاتے، اس کے باوجود جب جماعت اسلامی تھوڑے تھوڑے وسائل سے ٹاؤنز میں کام کرواتی ہے تو قبضہ میئر فرماتے ہیں کہ یہ پیسے کہاں سے آئے؟ مرتضی وہاب صاحب یہ پیسے اہل کراچی کے ٹیکسوں کے پیسے ہیں، انہوں نے کہا کہ میں ڈاکٹر فواد اور جماعت اسلامی کے دیگر ذمہ داران کو خراج تحسین پیش کرتا ہوں جنہوں نے گلشن اقبال میں ایک عام شہری کے گھر پر قبضے کی کوشش ناکام بنائی ہے،پیپلز پارٹی نے کرمنالوجی میں پی ایچ ڈی کیا ہوا ہے، وکلائ کی چندکالی بھیڑوں کے ساتھ مل کر قبضے کا دھندا چلا یا جا رہا ہے، فرضی دستاویزات پر گھروں پر قبضہ کیا جارہا ہے، جنرل عاصم منیر نے ایک ڈیڑھ سال پہلے کہا تھا کہ ہم سسٹم کا خاتمہ کریں گے اور اسی عرصے میں آصف علی زرداری صدر بھی بن چکے ہیں اور ان کو استثنیٰ بھی حاصل ہوچکا ہے،کراچی کے کسی بھی شہری کے گھر میں اگر قبضہ کی کوشش ہوگی تو جماعت اسلامی اس کے آگے دیوار بن کر کھڑی ہوجائیگی، ہم نے اس حوالے سے باقاعدہ ایک سیل قائم کردیا ہے، اب قبضہ گیروں کے خلاف عوامی مزاحمت کی جائے گی، قانون نافذ کرنے والے ادارے قبضہ گیروں کو لگام دیں، ہم اہل کراچی سے اپیل کرتے ہیں کہ وہ جماعت اسلامی کی عوامی کمیٹیوں کا حصہ بنیں، ہم سب مل کر اپنا دفاع کریں گے، انہوں نے کہا کہ پورے پاکستان میں بھی ایک طرح کا قبضہ سسٹم موجود ہے، کسانوں کی زمینوں پر قبضہ کرلیا جاتاہے، جب سیلاب آیا تو راوی کے ساتھ جعلی سوسائٹیز بنی ہوئی تھیں، ہم اس پورے سسٹم میں عوام کی ترجمانی کریں گے، پورے ملک میں جہاں کسی زمین پر قبضہ ہوگا جماعت اسلامی عوام کے ساتھ مل کر مظلوم کے ساتھ کھڑی ہوگی، میں ووٹ کو عزت دو کا نعرہ لگانے والوں سے یہ سوال کرتا ہوں کہ یہ کیسی ووٹ کی عزت ہے کہ عوام کو ان کا حق ہی نہیں دے رہے، ساری اتھاریٹیز کو اپنے قبضے میں لیا ہوا ہے، صورتحال یہ ہے کہ لاہور جیسے شہر کا یہ حال ہے اس کو ن لیگ نے ایک ٹاؤن کا اسٹیٹس دے دیا ہے، اب جو بھی چیئرمین ہوگا وہ صرف لاہور ٹاؤن کا چیئر مین ہوگا، ان کی سوچ یہ ہے کہ یہ کسی کو بھی بااختیار نہیں دیکھنا چاہتے، ن لیگ جمہوریت کے ج کے نقطے سے واقف نہیں ہیں، پوری پارٹی ایک خاندان کے قبضے میں ہے، سیاسی جماعتوں میں سوائے جماعت اسلامی کے کہیں الیکشن نہیں ہوتا،مینار پاکستان پر جماعت اسلامی کے اجتماع عام میں اہل کراچی نے بھرپورطریقے سے شرکت کی، میں کراچی سمیت پورے ملک کی عوام کو اجتماع عام میں بھرپورانداز میں شریک ہونے پر خراج تحسین پیش کرتا ہوں۔انہوں نے کہا کہ ٹرمپ جس نے فلسطین کو تباہ کرنے کے لیے اسرائیل کوتمام تر امداد فراہم کی اسے ہمارے حکمران سلیوٹ پیش کررہے ہیں، ہمارے 80 ہزار فلسطینی بھائیوں کے قاتل کو سلیوٹ کرنا ذہنی غلامی ہے، 1940میں قرارداد پاکستان کے ساتھ ساتھ قرارداد فلسطین پیش ہوئی تھی، قائد اعظم نے اسرائیل کوتسلیم نہ کرنے کا اعلان کیا، پاکستان نے ہمیشہ اسرائیل کی کھل کر مخالفت کی ہے،لیکن اب صورتحال ٹرمپ کے کہنے پر غزہ میں پاکستانی افواج کو بھیجنے کے لیے تیار ہے،جماعت اسلامی ایسے ہر اقدام کی مخالفت کرتی ہے، یہ پاکستانی فوج،عوام اور اس کے اصول موقف کے ساتھ ظلم ہوگا، افواج پاکستان فلسطینیوں کو غیر مسلح کرنے کے لئے نہیں بنی ہے، فلسطین کے مسئلے کاایک ہی حل ہے اور وہ ہے آزاد فلسطینی ریاست، اقوام متحدہ کے چارٹر کے مطابق حماس ایک قانونی اور جمہوری فورس ہے، امریکہ دنیا کا سب سے بڑا دہشت گرد ہے، پریس کانفرنس میں امیر جماعت اسلامی کراچی منعم ظفر خان، نائب امیر کراچی مسلم پرویز، جماعت اسلامی کے رکن سندھ اسمبلی محمد فاروق،ٹاؤن چیئر مین گلشن اقبال ڈاکٹر فواد احمد، جناح ٹاؤن چیئر مین رضوان عبد السمیع،سکریٹری اطلاعات زاہد عسکری بھی موجود تھے۔