حکومت دوریاستی حل کی رَٹ لگانا چھوڑ دے، قوم کبھی بھی امریکی غلامی تسلیم نہیں کرے گی، حافظ نعیم الرحمن

حکومت دوریاستی حل کی رَٹ لگانا چھوڑ دے، قوم کبھی بھی امریکی غلامی تسلیم نہیں کرے گی، حافظ نعیم الرحمن
مسٹر پرائم منسٹر آپ ٹرمپ حمایت کے غلط ٹریک پر چل رہے ہیں
حماس مزاحمت کا استعارہ، اس کے مخالف استعمار کے ایجنٹ ہیں
امیر جماعت اسلامی پاکستان کا لاہور میں غزہ ملین مارچ کے شرکاء سے خطاب
امیر جماعت اسلامی پاکستان حافظ نعیم الرحمن نے کہا ہے کہ حکومت دوریاستی حل کی رَٹ لگانا چھوڑ دے، قوم اسرائیل کو تسلیم کرنے یا ابراہم اکارڈ کی جانب پیش قدمی کرنے والوں کو عبرت کا نشان بنا دے گی۔ حماس نے ٹرمپ منصوبہ پر مشروط آمادگی کا اظہار کرکے دانشمندی کا ثبوت دیا، حماس مزاحمت کا استعارہ، اس کے مخالف سامراج کے آلہ کار ہیں۔ ان خیالات کا اظہار انہوں نے لاہور میں وحدت روڑ پر غزہ ملین مارچ سے خطاب کرتے ہوئے کیا۔
اہل فلسطین سے اظہار یکجہتی کے لیے ہونے والے مارچ میں خواتین، بچوں، بزرگوں سمیت عوام کی بڑی تعداد شریک تھی۔ تاحدِ نظر ہزاروں شرکاء نے فلسطینی پرچم اٹھا رکھے تھے، جلسہ گاہ حماس اور فلسطین کے حق میں نعروں اور ترانوں سے گونجتی رہی۔ نائب امیر لیاقت بلوچ، سیکرٹری جنرل امیرالعظیم، ڈاکٹر حمیرہ طارق، امیر لاہور ضیاالدین انصاری ایڈووکیٹ، ڈپٹی سیکریٹری اظہر اقبال حسن، اظہر بلال اور دیگر رہنماؤں نے بھی ملین مارچ کے شرکا سے خطاب کیا۔ مرکزی رہنما جماعت اسلامی حافظ ادریس نے دعا سے مارچ کا اختتام کیا۔ ڈپٹی سیکرٹری عثمان فاروق، سیکرٹری اطلاعات شکیل احمد ترابی، حلقہ خواتین اور اسلامی جمعیت طلبہ کی قیادت بھی اس موقع پر موجود تھی۔
امیر جماعت اسلامی نے خطاب کرتے ہوئے کہا کہ غزہ پر اسرائیلی جارحیت کو دوبرس گزر چکے اور اس دوران ملک میں حکومتی اور اپوزیشن پارٹیوں کی طرف سے ایک دفعہ بھی نیتن یاہو اور ٹرمپ کی مذمت نہیں کی گئی، ملک کا حکمران طبقہ اور اسٹیبلشمنٹ ٹرمپ کی آشیرباد چاہتا ہے، یہ اپنی باریوں کے انتظار میں ہیں۔ انہوں نے شہباز شریف کو مخاطب کرتے ہوئے کہا کہ مسٹر پرائم منسٹر آپ غلط ٹریک پر چل رہے ہیں، امریکہ زوال پزیز قوت ہے، دنیا میں طاقت کے مراکز تبدیل ہورہے ہیں اور آپ ٹرمپ کی خوشامد میں مصروف اسے نوبل انعام کے لیے نامزد کرچکے ہیں۔ انہوں نے کہا کہ اگر کوئی سمجھتا ہے کہ طاقت کے زور پر اسرائیل کو تسلیم کروا لے گا تو جان لے کہ پاکستانی قوم بندوق کی طاقت کا جواب ایمانی طاقت سے دے گی۔ امریکہ سے پاکستان کو کوئی فائدہ نہیں ہوا، امریکہ کو معدنیات فروخت کرکے ملک کی معیشت نہیں سنورے گی، معیشت میں بہتری لانا مقصود ہے تو نوجوانوں کو تعلیم اور آئی ٹی تربیت فراہم کیجیے، حکمران اپنی مراعات کم کریں اور عوام کے ساتھ کھڑے ہوجائیں۔
حافظ نعیم الرحمن نے اپنے خطاب میں وزیراعظم سے حالیہ رابطہ کا تذکرہ کرتے ہوئے کہا کہ انہوں نے شہباز شریف پر واضح کیا ہے کہ مسئلہ فلسطین پر حکومت کو قومی اور اصولی موقف اپناناچاہیے۔ امیر جماعت اسلامی نے بتایا کہ جب وزیراعظم نے انہیں کہا کہ دوریاستی حل پر ن لیگ اور جماعت اسلامی میں اختلاف ہے تو انہوں نے واضح کردیا کہ جماعت اسلامی کا وہی موقف ہے جو بانی پاکستان قائد اعظم ؒاور پوری قوم کا ہے، اسرائیل ایک قابض ریاست ہے اور پاکستان اس کے وجود کو کبھی تسلیم نہیں کرے گا۔ حافظ نعیم الرحمن نے کہا کہ جو کوئی بھی حماس کی مخالفت کرتا ہے وہ دراصل سامراج کا ایجنٹ ہے۔
انہوں نے کہا کہ حماس نے ٹرمپ معاہدہ کے جواب میں نہایت دانشمندی اور تدبر کا مظاہرہ کیا، حماس کے جواب کے بعد ٹرمپ نے اسرائیل سے حملے بند کرنے کی اپیل کی جس پر تاحال عمل نہیں ہوا، اسلامی دنیا کے حکمران اس دہشت گردی پر امریکی صدر سے سوال کیوں نہیں کرتے۔ انہوں نے کہا کہ ہم اللہ کا شکر ادا کرتے ہیں کہ دنیا میں سامراج کی مزاحمت میں حماس نے تاریخ رقم کردی، حماس کی مزاحمت انسانیت اور خصوصی طور پر اسلامی تحریکوں کے لیے درس گاہ ہے، حماس کے مجاہدین نے نظم وضبط اور سمع و طاعت کی اعلیٰ ترین مثال پیش کی۔ امیر جماعت اسلامی نے گلوبل صمود فلوٹیلا پر اسرائیلی جارحیت کی مذمت کی اور حکومت سے مطالبہ کیا کہ سینیٹر مشتاق سمیت دنیا بھر سے تعلق رکھنے والے تمام گرفتار امدادی کارکنوں کی رہائی کے لیے فوری کوششیں کرے۔
امیرجماعت اسلامی نے اعلان کیا کہ اتوار 5اکتوبر کو کراچی میں اہل فلسطین سے اظہار یکجہتی کے لیے ملین مارچ ہوگا۔ انہوں نے قوم سے اپیل کی کہ 7اکتوبر کو گیارہ بجے دن گھروں سے نکل کر ”فری فلسطین“ تحریک کے حق میں آواز بلند کریں۔ انہوں نے اکیس بائیس تئیس نومبر کو مینار پاکستان تلے ہونے والے اجتماع عام میں عوام کو شرکت کی دعوت دی اور اس عہد کا اعادہ کیا کہ ”نظام بدل دو“ نعرہ کے تحت ہونے والا تاریخ ساز اجتماع ملک، سیاست اور نظام میں تبدیلی کا پیش خیمہ ثابت ہوگا اور نئی صبح کا آغاز ہوگا۔