تعلیمی نظام کی تباہ حالی پر حافظ نعیم الرحمٰن کا اظہار تشویش، سرکاری تعلیمی ادارے مضبوط بنانے کا مطالبہ

قومی تعلیمی ڈائیلاگ سے خطاب میں امیر جماعت اسلامی کی پانچ تعلیمی نظاموں، طلبہ یونین پر پابندی اور اسکولوں کی آؤٹ سورسنگ پر تنقید۔

1 منٹ

اسلام آباد: امیر جماعت اسلامی پاکستان حافظ نعیم الرحمٰن نے اسلامی جمعیت طلبہ کے زیر اہتمام منعقدہ قومی تعلیمی ڈائیلاگ سے بطور مہمان خصوصی خطاب کرتے ہوئے ملک میں تعلیم کی زبوں حالی پر گہری تشویش کا اظہار کیا۔

تقریب سے وفاقی وزیر منصوبہ بندی احسن اقبال، سابق وزیراعظم شاہد خاقان عباسی، سابق اسپیکر قومی اسمبلی اسد قیصر اور ناظم اعلیٰ اسلامی جمعیت طلبہ پاکستان صاحبزادہ وسیم حیدر نے بھی خطاب کیا۔

حافظ نعیم الرحمٰن نے کامیاب تعلیمی ڈائیلاگ کے انعقاد پر اسلامی جمعیت طلبہ کو مبارکباد دیتے ہوئے کہا کہ تعلیم حکومتی ترجیحات میں شامل نہیں۔ ان کا کہنا تھا کہ ملک میں پانچ مختلف تعلیمی نظام موجود ہیں، ایسے میں یکساں قوم کی تشکیل ممکن نہیں۔

انہوں نے طلبہ یونین پر پابندی برقرار رکھنے پر تنقید کرتے ہوئے کہا کہ اس سے سیاست کی نرسری اور تعلیمی اداروں کا پرامن ماحول تباہ ہو رہا ہے۔ طلبہ یونینز نوجوانوں کی سیاسی تربیت اور قیادت کے فروغ میں اہم کردار ادا کر سکتی ہیں۔

امیر جماعت اسلامی نے پنجاب اور خیبر پختونخوا میں سرکاری اسکولوں کی آؤٹ سورسنگ کو ناکام قرار دیتے ہوئے کہا کہ حکومت سرکاری تعلیمی اداروں کو نجی تحویل میں دینے کے بجائے خود ان کی بہتری اور مضبوطی پر توجہ دے۔ انہوں نے یونیورسٹیوں کے لیے فنڈز کی کمی اور تعلیمی معیار میں گراوٹ پر بھی تشویش ظاہر کی۔

حافظ نعیم الرحمٰن نے کہا کہ دو کروڑ 75 لاکھ بچوں کا اسکولوں سے باہر ہونا ان کے آئینی حقوق کی خلاف ورزی ہے۔ حکومت کی ذمہ داری ہے کہ ہر بچے کو تعلیم کے حصول کے مواقع فراہم کرے۔

انہوں نے زور دیا کہ ملک میں معیاری اور یکساں تعلیم کے فروغ کے لیے سرکاری تعلیمی نظام کو مضبوط بنانا، تعلیمی اداروں کو مناسب وسائل فراہم کرنا اور طلبہ کو مثبت تعلیمی و جمہوری ماحول دینا ضروری ہے۔