ٹنڈوآدم 10فروری 2019ء: قرآن کا پیغام عام کرنے کیلئے وسیع پیمانے پر جدوجہد کی ضرورت ہے، لوگوں کو نیکی کی طرف بلایا جائے.قرآن کے نظام اور پیغام سے ہی معاشرے میں تبدیلی آئیگی جو ناانصافی، کرپشن، بدعنوانی اور ظلم کے خاتمے کا سبب بنے گی ۔عوام الناس کو بدی کے راستے سے ہٹا کر نیکی کے راستے پر ڈالنا ہی اصل نیکی ہے ان خیالات کا اظہار جماعت اسلامی سندھ کے نائب امیروممتازمبلغ حافظ نصراللہ عزیز نے ٹنڈوآدم اور شاہ پور چاکر میں تقریبات سے خطاب اور صحافیوں سے گفتگو کرتے ہوئے کیا۔ اس موقع پر ضلع سانگھڑ کے امیر رفیق احمد منصوری، شاہ پور چاکر کے امیر سلطان احمد بھی موجود تھے، انہوں نے کہا کہ ملک میں اسوقت حکومت نے عوام کو ریلیف دینے کے بجائے ان پر مہنگائی کا بوجھ لاد دیا ہے،اپنے دووں کے برعکس گذشتہ چھ ماہ ریکارڈ قرض لیکر ملک کو مزید مقروض کردیا گیا ہے۔ پی ٹی آئی نے اپنے انتخابی جلسوں میں جو وعدے کئے تھے اور عوام کو سبز باغ دکھا ووٹ لئے تھے ان میں سے کونسا وعدہ پورا ہوا. تعلیم، صحت، روزگار، پینے کا صاف پانی عوام کی بنیادی ضرورت ہے جو وفاقی و صوبائی حکومتیں عوام کو فراہم کرنے میں ناکام رہی ہیں۔ انہوں نے کہا کہ ضلع سانگھڑ معدنی وسائل سے مالا مال ہے مگر اس ضلع میں پینے کا صاف پانی بھی عوام کو میسر نہیں ہے، انہوں نے کہا کہ اشیائے خورونوش اور ادویات کی قیمتوں میں مسلسل بے تحاشہ اضافے نے عوام کمر توڑ کر رکھ دی ہے. ادویات بنانے والی کمپنیاں غریبوں کا خون نچوڑ رہی ہیں۔